Kuantas shakás kontadas

Los musafires

Un ombre telefoneó a su madre a informarle ke venía a su sivdad de vijita, a ver si se pudieran enkontrar para komer un día.

"Atyó" disho la mamá, "siguro. I te kedas en kaza i te apronto el sofá para ke durmas ayí."

"Ama mamá," respondió el ombre, "me va a akompanyar mi mujer.  Los dos no puedemos durmir en el sofá."

"No te merekíes," disho la mamá, "vos desho mi kamareta, i yo me echo en el sofá del salón."

Más tadre, el ombre telefoneó de muevo, "mamá, ivamos a mandar al ijo a la kaza de un amigo suyo, ama ya no lo puede arresivir, lo tenemos de traer kon mozotros."

"No estés a pensar, mi alma, meto al ijo en el sofá i tengo una otra kamareta para guadrar kozas.  Lo despajaré un poko i me echaré ayí."

Al otro día, telefoneó otra vez el ombre, "mamá, perdóname, ama la madre de mi mujer está hazina, no la podemos deshar sola.  Kale yevarla kon mozotros."

"Está bueno, ijo mío," respondió la mamá, "Eya se puede echar en la otra kamaret.  Vo a meter manteles i sávanas en la kuzina, i ayí me echo yo."

"Grasías, mamá, sos una djoya," le agradesió el ombre.

Al otro día, telefoneó otra vez, "mamá, a mi kompanyero de lavoro le anularon la rezervasión del otel..."

"No estés a pensar," interumpió la mamá, "él se va a echar en kuzina."

"Ama, mamá, ánde te vas a echar tú?" demandó el ombre.

"Yo...  yo me vo a echar por la ventana," respondió la mamá.

Kantar en la ducha

Una mujer vieja suvió al otobús i se asentó al lado de un mansevo.

Se abolta al mansevo i le demanda, "tú, kuando te duchas, uzas kantar?"

La mira el mansevo, i responde kon alegría, "saves ké, sí, a mí me agrada muncho kantar kuando me ducho!"

Lo mira la vieja i le responde, "Dunke, ya ay muncho ke no kantas, verdad?"

El farmasista

Un ladrón entra en una farmasia i va a la kasha.

Kita una pistola i la apunta al farmasista, i grita, "dame las parás!"

Ama el farmasista lo mira sin parpadear.

"No me vas a dar las parás?" demanda el ladrón.

Responde el farmasista, "sinyor, akí no se da nada sin recheta."