Unos mezes atras tomi haber de un grupo ke se formo para djovenos kon el buto de ambezarles de la kultura serfardi. Se yamava Bivas.org i fue fraguado por Miriam Raphael ke buskava djente ke pudiera ayudar de forma voluntaria.
En mi umilde opinion, lo mas importante para mantener biva la lingua es ke seyga atraktiva para los djovenos, ansi ke me kontakti kon Miriam a ofreserme, pensando ke podía ser echar lashon kon eyos de vez en kuando por WhatsApp o por Zoom. Ama no fue ansina!
En avlando kon eya (la enkargada) me aseventi ke la mas parte de eyos tenían muy poko konosimiento de la lingua – de vez en kuando avian sentido una kantika, ama poko mas – i ke estavan empesando del zero! Ansi ke me komprometi a dar klasas a los djovensikos una vez a la semana.
Ke horror! Yo, ke no se nada de dar lisiones ni so avlante nativo. Ama, me alegro muncho de averlo echo porke ave sido un plazer enorme verlos empesar a ambezarsen i me da muncha alegria poder ayudar a ke la lingua siga biva.
Ansi ke vos kero dar un poko mas informasion sovre el grupo kon la esperansa ke algunos lektores kereran ayudar en la inisiativa.
Ken partisipa? - Los partisipantes son de la edad del liseo (high school), es dezir de 15 a 19 anyos. No solo los sefaradis partisipan -- anke el grupo tiene el buto de preservar la kultura sefaradi, ay partisipantes ashkenszis i kualker persona ke tiene enteres por preservar la kultura, o ambezarse la lingua, es bienvenida.
Kualo azemos? - Preparamos aktividades simples en ke los elevos pueden praktikar la pronunsasion, el alfabeto i frazas tipikas. Sovre todo, tratamos de avlar de kozas relevantes para la vida de los djovenos: Aktividades kon amigos, la eskola, la famiya, la kumida, ets.
El mez pasado, mos ambezimos tres kantikas populares, i los djovenos las kantaron en la Gala de la Ermandad Sefaradi ke tuvo lugar el 17 de desembre 2023 en NYC. Sovre todo, mos divertimos!
Komo lo azemos? - Damos las klasas en Zoom (ansi ke todo el ke kere puede partisipar desde ande esta) los mierkoles a las 6:00 ora Seatle, WA, USA. Por agora solo ay una sesion a la semana, ama si mas djente en otras partes del mundo kere partisipar, podemos azer otras sesiones sigun la ora ke le konvenga.
Tambien, achetaremos ayuda de kaulker manera: En forma de apoyo finansario, materiales de ambezamiento, dar lisiones (de vez en kuando o regolarmente), ets.
Mi vision personala para las klasas es ke los djovenes rekonoskan al ladino komo una lingua biva, relevante i emportantes para sus vidas:
Ke un dia puedan avlar entre eyos en esta lingua de manera sosiala.
Tambien ke esta lingua les avra las puertas al mundo, porke uno ke avla ladino no va tener dingun problema en entender el espanyol moderno i tambien les fasilita la komunikasion kon otras linguas romansas; i kreyo yo ke esto les va a ser un benefisio al momento de viajar, azer investigasiones o bushkar lavoro (komo era para mi).
I siguramente, kero ke mantengamos el patrimonio kultural djudio para siempre.
Si tenesh kaulkera demanda, si keresh partisipar en el grupo o tenesh famiya a ke le puede enteresar, por favor no ezitesh de kontaktarme. Mi mel es aar.shapiro@gmail.com
Comments