Muestro Sentro Sefaradi de Estambol se fundio el 1 de Disembre de 2003, djusto 15 dias despues de los atakes desgrasiados a las sinagogas en Estambol. Desde akel tiempo estamos penando para ke muestra lingua kerida sovrebiva munchos mas anyos. Es verdad ke tuvimos munchos proyektos ke no tenian dar i aver kon la lingua ama todo modo de publikasion ke salio de muestro Sentro (CDs, livros ets) salieron en 3 linguas: Turko, Inglez i Judeo-Espanyol. Esto fue muy importante porke fue por la primera vez ke se publikavan kozas i en Judeo-Espanyol. Normalmente, si aviya la traduksion al inglez, siempre era sufisiente.
La koza la mas importante ke izimos fue empesar a publikar la gazeta, El Amaneser en Marso del 2005. Esto tuvo un grande sukseso en el mundo entero porke era la unika gazeta enteramente en Judeo-Espanyol ke se publikava una vez al mez. Todos kijieron eskrivir, todos kijieron partisipar i esto fue muy muy bueno porke mos dio grande koraje. Güler Orgun, ke es la koordinadora, aviya empesado por 5 anyos solo. Ya pasaron 17 anyos i Güler kontinua porke despues de un tiempo no pudo desharlo! Ke pueda kontinuar su importante lavoro munchos munchos anyos mas!
El Amaneser tiene 24 pajinas de eskritas ke mos vienen del mundo entero i de la Turkiya siguro, ma tambien desde 3 anyos tiene i 8 pajinas al mez de un suplemento muy importante: la transliterasion del Meam Loez, el mas grande lavoro literario en Judeo-Espanyol en el mundo Judio. Todos los livros del Meam Loez en el mundo no son traduksiones del orijinal por esto lo ke estamos publikando es muy muy valorozo. El Meam Loez es los livros de la Tora eksplikados para ke el puevlo judio los entienda.
Ya ay unos kuantos anyos ke tambien tenemos la responsabilidad de la pajina en Judeo-Espanyol del jurnal Şalom, la sola gazeta de la komunidad judia turka ke se publika una vez a la semana. Agora tenemos munchos eskritores muevos, munchos mansevos ke mos eskriven i esto mos da muncha alegria. Komo tenemos bastantes eskritores, el Şalom mos da dos pajinas en Judeo-Espanyol una vez al mez i siempre inchimos estas pajinas sin difikultad! Unos kuantos anyos antes esto no era posivle.
Vendremos al renasimiento! La pandemia fue una desgrasia para el mundo ama para el Judeo-Espanyol, fue una maraviya! Los ke estavan enserrados en las kazas kijieron inchir sus tiempo kon kozas para las kualas no teniyan tiempo en sus vidas normales. En el mundo entero empeso un intereso para el Judeo-Espanyol, para las raizes, para la kultura sefaradi, erensia de abuelos otomanos! Todos empesaron a kerer ambezarsen la lingua. I empesaron munchas munchas aktividades en este kampo.
En primero, munchos amigos empesaron a dar lisyones de Judeo-Espanyol en el ZOOM. Grasias a este Zoom, ke un monton de aktividades se pudieron azer. Vimos ke muy muncha djente se eskrivieron en los kursos de lingua! I siguro ke empesaron a ambezarsen. Mozotros kijimos enkorajarlos i apartimos una o dos pajinas en El Amaneser para las eskritas de los elevos. I ay kaji un anyo ke los elevos incheron estas pajinas. Ay munchos kursos enrejistrados en las pajinas de Facebook i de YouTube de la Ermandad Sefaradi.
Entremientres, mozotros en el Sentro Sefaradi konstruimos un sitio de web de vendida de todos los produktos ke tenemos: www.istanbulsephardiccenter.com i por primera vez en el mundo un website tiene komo opsion de lingua, el Judeo-Espanyol! Vos puedesh imajinar komo de lavoro izimos! Oras i oras de traduksiones. Ama fue una koza maraviya porke kon este website pudimos i vender el abonamiento a la versyon dijital de El Amaneser, ke fue muy bueno porke la djente agora se puede abonar kon una suma muy barata ($17 o €15 depende del pais al anyo) i los puede meldar sin asperar asta ke venga la versyon en papel kon la posta.
Publikimos 5 livros de Matilda Koen-Sarano, i estos livros konstituyen un trezoro importante para los ke keren meldar i ambezarsen el Judeo-Espanyol.
Tenemos el uniko livro de karikaturas en Ladino, echas por Irvin Mandel i tradusidas por mi. Unas kuantas de eyas estan djugadas en muestro kanal de YouTube del Sentro Sefaradi ande puedesh topar munchas otras kozas.
No mos olvidimos la popularidad de los medios sosyales komo Facebook i Instagram. Un anyo entero publikimos UN BIERVO AL DIA i despues al anyo sigiente publikimos la FRAZA DEL DIA. 300 biervos tradusidos al turko, ingles i espanyol i 300 frazas yene tradusidas a estas 3 linguas. Esto todo se puede topar en muestro website www.sefarad.com.tr
Tambien kero mensionar los ENKONTROS DE ALHAD organizados por Liliana i Marcelo Benveniste endjuntos kon 13 institusiones de Ladino en el mundo entero. Ya ay un anyo i medio ke kada Alhad tenemos un/a balay/a kon su/s musafir/es ke avlan el Judeo-Espanyol una ora entera. Todos los Enkontros estan en YouTube.
El Judeo-Espanyol, ke aviyan dicho en los anyos '70 ke ya estava muerta, esta mashalla muy sana i biva i auguro ke el Dio i todos los Ladinoavlantes le den aun munchos mas anyos de vida! Amen!
Comments