Itahdut Yotsei Turkiya be Israel (IYT), la Asosyasyon de los Turkanos en Israel, fondada mas de 60 anyos antes, kon el eskopo de ayudar la aliya de los djudios turkanos, se puede dizir es la sola asosyasyon ke fue establisida en Israel por los primeros olim (imigrantes) turkanos i ke kontinua su aksyon mizmo oy en dia. Ancha fue la istoria de esta institusion la kuala kon los anyos no solo miro i mira de ayudar a los olim turkanos de sovrepasar las difikultades primeras de la integrasyon, ma en mezmo tiempo dar a konoser al publiko israeliano la erensia sefaradita ke tuvo i tiene la grande komunitad turka partikularmente establisida en Estambol, la kuala se achiko kon los anyos.
Se pretende ke agora lo ke kedo de djudios en Turkia no depasa kinzemil almas. La mayoriya de esta grande komunidad djudia erensya del Imperyo Otomano, por lo mas se transfero a Israel después de la fundasyon del estado i se pretende ke los ke biven oy en Israel kon sus desendientes sabras son serka de 85.000 personas. Kere dizir ke la mayoriya de los djudios turkanos se izieron israelianos.
Al lado del lavoro echo por un punyado de mansevos de la sinkena jenerasyon de olim, juntos kon unos kuantos sponsores no solo ayudan a la integrasyon del olim, ma dan bekas de estudyos universitarios a mansevos djudios de Turkiya ke vienen a estudyar en las universitades israelianas. Estos apoyos morales i materiales son sin dinguna pretansyon i esto aze la fuersa de la institusyon. Siempre ke las otoridades lokalas preguntan ayudo sovre komo komentar la atitud turka del dia, eya es pronta a dar su opinyon. Ademas mantener relasyones amikalas kon los reprezentantes diplomatikos turkos es uno de sus rolos i de mi punto de vista dire ke amistades fueron establisidas entre siertos de sus miembros kon siertos ofisiales turkos.
En despartes de esto la IYT miro i mira de estableser buenas relasyones kon la Turkiya. El negosyo aktual depasando los 7 miliardas de dólares enkoraja a los dirijantes de la asosyasyon a dezvelopar buenas relasyones de puevlo a puevlo. Enkorajar el turismo entre las dos nasyones i mirar de luchar kontra el antisemitizmo fondamantalisto de la klasa politika turkana , de la medya i de la elita anatoliana relijioza sin grande kultura. Difisil lavoro ke nesesita muncha pasensya,atansyon i takt.
Dezde un tiempo siertos miembros aktivos de la IYT sigen de serka la prensa i la televizyon turka para luchar kontra el antisemitizmo, el anti israelizmo i la propaganda araba muy influente en Turkiya, sovre todo de mirar de influensar los editorialistas a no achetar i publikar las mintiras sovre la istoria djudia i los evenemientos entre Israel i los arabos. Ajustare de mi perspektiva personal ke munchas vezes están teniendo un buen resultado. Ademas la IYT teniendo el sityo, la platforma web “Turk Israel. Org” da dia por dia, novelas del payis, novelas i akontesimientos sovre la komunidad turkana en Israel i artikolos eskritos por miembros influentes de esta mizma komunidad en turko, en ladino i en ebreo. El sitio es solisitado por miles de lektores no solo de Israel ma de las kuatro partes del mundo i en partikular de Turkiya.
Los aktuales dirijentes de la IYT son todos volontaryos ke se komportan kon hohma i responsabilidad i tienen komo prensipyo de ser klaros i transparentes en sus aksyones. Achetan kon benevolensya toda kritika positiva. Esto mostra el komporto el kual es gravado en muestra konsensia komun konsiderada komo la baza del entendimiento de la demokrasia de la sosietad moderna a la kuala apartenemos. Lo ke kere dizir ke son dispuestos a ser kontrolados sovre la manera ke dirijir la administrasyon de la asosyasyon.
Las anyadas pasan i el budjeto pujando, las kotizasyones i las donasyones no abastesen a los gastes. Munchas vezes, sorprezas dezagreavles meten los dirijentes en apreto ke no saven ande dar la kavesa para arekojer dinero.
Pokos son los djudios turkanos ke keraran apiadarsen de los dirijentes en estrechura, los kualos se topan en la imposibilita de trayer inovasyones muevas. De memoria savemos ke los turkanos en mayoriya no son muy interesados a las institusyones siviles ke rijen la sosieta en la kuala biven. Esta mankura de entereso sovrebivyo kon los olim ke kontinuan a no dar apoyo material a sus proprias institusyones en Israel. Pokos son los ke lo azen, i el slogan “kayades” istoriko kontinua en la memoria de munchos de mozotros. El “ne melazimlik” turko se izo israeliano. Porke el olim turkano no le gusta institusyonarse? En observando la sosieta israeliana la persona se rende kuento de esta mankura i se demanda deke? Espero ke la konsensya kon tiempo se espertara i lo mas de mozotros intendieran los benefisyos a unarse libremente en asosyasyones i de ayudar mizmo kon lo poko ke se tiene en la aldikera.
Keridos lektores, voz rogo de eskucharme kon fervor, vos demando a vinir vijitar el sentro de la IYT onde serash recividos kon alegriya i kontentes.
Comentários