
En los Estados Unidos el anyo 2024 fue yeno de aktividades i okaziones espesiales en el kampo de Ladino, lo ke mos aze alegrar, i ogurar “para munchos anyos,” “munchos i buenos” i “vidas largas!”
La mas vieja organizasion de Ladino en Internet, Ladinokomunita, kumplio i fiesto 25 anyos de su vida Alhad el 29 Desembre, 2024, en un program espesial de los Enkontros de Alhad. La idea de formar un foro en Internet para korespondensias en ladino avia vinido de Moshe Shaul (z”l) durante el primer Kolokio Internasional organizado por la Autoridad de Ladino en Yerushalayim en oktobre, 1999. Despues ke retorni de este kolokio lo ize yo, empesando kon unos kuantos de mis amigos i amigas, i en pokos anyos yegimos a tener asta mas de 1600 miembros de unos 40 paises del mundo. Kontinua oy en dia kon 1465 miembros, i archivos de mas de 100,000 mesajes, kon mas yegando kada dia i fotos i “files” yenos de artikolos sin kuento, ke son—i van a ser por siempre—un trezoro para investigadores i todos los enteresados en muestra lingua i kultura.
Lo mas de las aktividades en ladino se realizan mezo Internet, kon la kolaborasion i partisipasion de personas en otros paises tambien. Entre estos esta los Enkontros de Alhad ke tienen lugar kada semana via Zoom desde 2020. Kada uno es komo un “TV talk show”: un balabay, repreznetando su institusion (uno de los 14 ke partisipan de los Estados Unidos, Turkia, Fransia, i Arjentina) konversa kon un musafir sovre un sujeto enteresante. Esto fue establesido por Liliana i Marcelo Benveniste, muestros amigos de Buenos Aires, ke entre munchas otras inisiativas, fondaron tambien el maraviozo boletin en linya esefarad.com ke egziste desde 2008 i inkluye muncho material en ladino. El Enkontro de Alhad numero 200 fue selebrado kon kantes i kuentos el 24 de novembre, 2024. Todos los Enkontros pasados se pueden ver en Youtube, ande van a kedar por siempre komo un emportante archivo del Ladino avlado.
En Junio de 2024 sovre la sujestion de una miembra de LKen Argentina, empesi a mandar un kurto mesaj a la semana en forma de audio. No trato de kozas emportantes o seriozas, ma de vista Liliana i Marcelo Benveniste los metieron en Youtube para ke keden para siempre. I despues la Liga Amerikana de Ladino las eskojo komo “manadero del mez” en desembre!

Ah, La Liga Amerikana del Ladino (LAL o ALL)! Kreygo ke esta es la mas emportante inisitaiva del anyo 2024 para el Ladino en los Estados Unidos. Bryan Kirschen i Hannah Pressman izieron el mas grande lavoro para kriar esta organizasion (aunke mi nombre aparese komo ko-fondadora) i dainda azen para mantenrla komo un sentro de todo lo ke konserna el Ladino en la Amerika. Entre todo lo bueno ay el Ladino Lounge de kada mierkoles, ke es favorido de todos los ke partisipan. Tiene la seria de entrevistas kon autores ke eskriven o uzan el ladino, ande ya figuraron Gloria Ascher, Sarah Aroeste, Ruth Behar, i Roz Kohen.
La LAL apoya i kolabora kon todo lo ke konserna ambezar ladino a kriaturas i mansevos, komo Bivas, la organizasion de djovenos i el Sephardic Adventure Camp, el kamping para kriaturas en el estado de Washington. Bryan estuvo ayi en persona para ambezar frazas i kozas en ladino a las kriaturas. El primer aniversaryo de la LAL va koinsidar kon en el ochen (8th) Dia de Ladino de New York (NYLD) ke se va fiestar el 2 de Febrero, 2025. NYLD es una grande i emportante fiesta de muestra lingua ke se realiza grasias a la inisiativa i lavor de Bryan Kirschen i Jane Mushabac, kon el apoyo de munchos otros.

Bryan Kirschen es komo un pilar del Ladino en el mundo! Si vos digo todo lo ke aze, no va tener lugar de eskrivir nada mas. El fondo i dirija Los Shadarim, un grupo de aktivistas i profesores de ladino de munchos paises ke kolaboran kon la Autoridad de Ladino en Israel. Basho la direksion de Bryan, Los Shadarim realizaron sus primer Kolokio via Zoom, en tres dias 19-21 Novembre, todo en Ladino—i las gravasiones estan agora en Youtube grasias a eSefarad (Liliana i Marcelo, siguro!)
Ay muncho mas de inkluyir en un resumen de Ladino en 2024 en l’Amerika, ma lo mas emportante es alegrarmos ke muestra lingua esta ganando fuersa i vigor, i esta en kamino de kontinuar a espandirse. I por esto, kada paso en esta direksion merese muestras bendisiones, i muestros suetos de “para munchos anyos inshallah.”
Mashallah! Me plaze muncho saver ke 2024 fue un anyo bueno para el Ladino! 2025 ya kamina, ke pueda ser muy mijor, kon reushitad kumplida! Grasias a Rachel Bortnick por su lavoro para mantener bivo el Ladino!