Keridos meldadores,
Si estash meldando i entendiendo estas linyas es porke ya avlash el djudeo-espanyol o porke pasatesh vuestro anyo enserrados en kaza ambezandovos la lingua. Esta letra es para los “elevos” de la lingua; los ke tomatesh klasas de la Ermandad Sefaradi kon mi, kon la sinyora Rachel Bortnick, kon la sinyora Daisy Braverman, i/o kon la sinyora Karen Sarhon (indemas de klasas kon otros). Pasimos un anyo muncho difichile, ma tambien reushimos a fraguar una komunita.
Kuando empeso la pandemia, la Ermandad Sefaradi devista establesio su Akademia Dijitala Sefaradi. Una de las demandas mas komunes ke arresivo agora es la sigiente: “kualo va pasar despues, kuando todos tornan a sus echos i ya no topan el tiempo de pasar tantas oras enfrente de sus ekranes”? Kualo azemos estonses? Por siguro, puedesh tomar mas lisiones para segyir dezvelopando vuestro dominio de la lingua, ma me aprovecho de este espasio para darvos algunos konsejos adisionales:
Munchos de vozotros vos izitesh amigos kon otros elevos. Tengo sintido anekdotas de amistades ke formatesh, i es koza de tresalir. Si vos topash en la mizma sivdad de otros, vijitad una kavane i echad lashon endjuntos. Si no morash serka, kulanead ZOOM para enkontrarvos de vez en kuando.
Uzad vuestros talentos. Kualo vos plaze azer? Si vos agrada kantar o tanyer un instrumento, enrejistrad una kantika i suvilda a YouTube, Instagram, Twitter, o TikTok. Si vos plaze eskrivir, eskrivid una istoria, una konseja, una poezia, o una ovra de teatro. Para los artistas, disenyad, pintad, i kread. Imajinad!
Suskrividvos i partisipad en foros dijitales no solamente sovre la lingua ma en la lingua. A kualo asperash? Ladinokomunita (https://ladinokomunita.groups.io) es uno de los grupos mas aktivos i tiene una koleksion de korrespondesia de mas de vente anyos. I tambien, ay munchos grupos en ladino ke se topan en Facebook.
Abonadvos a El Amaneser, la unika gazeta enteramente en ladino ke mos keda. Se estampa kada mez en Estambol. Tiene una pajina espesial para eskritos de elevos, ande puedesh eskrivir algo i prezentarvos al mundo. Apoyad las muevas puvlikasiones en la lingua i merkaldas, si puedesh i keresh. Son eskritas para vozotros!
Asistid a los programas ke se azen en ladino. Keremos vervos en los Enkontros de Alhad, las konferensias, los Dias del Ladino, los konchertos, etch. I si keresh partisipar en un Dia del Ladino en vuestra sivdad, estado, o paiz, ay munchas oportunidades de kolavorasion.
A los nonos/papus i a las nonas/vavas: avlad kon vuestros inyetos sovre vuestra lingua i kultura. Vos enkorajo a avlarles en la lingua o, a lo manko, ambezaldes vuestras kantikas, konsejas, i dichas (i, por siguro, vuestras reseftas). Afilu ay unos kuantos kavzos de djenitores ke estan avlandoles a sus kriaturas en la lingua; esto es muy importante i lo azen aunke demanda muncha pasensia i dedikasion. I a los mansevos: demandad! Ay munchos ke keren ayudarvos i ambezarvos. Esta lingua es vuestra; guadralda komo el trezoro ke es.
En fin, vos eskrivi solo unos kuantos konsejos ke me vinieron al tino, i se ke ay mas. Si tenesh sujestiones o ideas, partajaldas kon mozotros. Vos felisitamos por todo lo ke logratesh oganyo i asperamos a ojos a ojos arresivir vuestros haberes buenos i selebrar vuestra reushita.
Adelantre, kon salud i beraha!
Comentarios