La Novia del Muerto - Kapitolo 4

ROMANSO SENSASIONAL

Kompuesto por:

Elia R. Karmona

Direktor del Djugetón

 Ideado por

Yitshak Rafael Mizrahi

5684

Presio del número 100 parás

Imprimería El Djugetón

Estanbol Sultán Hamam Mesadik Han Nu. 11

(Transliterado por Miriam Sherman)

KAPÍTOLO 4

Alegre de aver reushido en su pensamiento, Sharl tomava al braso ala beya Sofía akeya noche i se la yevava a pasear. Eyos se ivan a un teatro, se divertían por akí i por ayá i retornavan en kaza ala manyana.

Sofía se iva a echar a su kaza i Sharl en lugar de irse a su echo, se repozava dos oras en su kaza i se iva después a ver a su prima.  

La madre kon la ija se avían levantado akeya ora del lecho. Komo su uzo, la tía resivía al sovrino kon kara alegre. Kuanto a Lina, eya saludava a su primo ermano kon un tono muy yelado.

El moso, sirviéndoles el kafé kon leche, Sharl también tomava una tasa, rondjando de ves en kuando algunas miradas a su prima, ke Lina lo remarkava muy bien.

Por un preteksto kualunke, la madre dela novia salía afuera i se iva ala otra tabaká, deshando solos a Sharl kon su ija. Esta última profitando dela okazión de este retiro de su madre, por aderesar la palavra a su primo:

Bravo Sharl, ayer tadre me izites la sangre fría.

Ke uvo Madmuazel, ké akontesió?

Topates djusto loke me avlates la ora de las felisitasiones del despozorio? Mismo ke lo dirías por burlar, yo no lo topo djusto, tanto más ke mi kerido Armand lo remarkó.

Antes de todo, te diré kerida Lina ke yo no lo ize por burla, yo te lo dishe por verdad.  Este korasón tuyo es a mí ke deve apartener i no a Armand. Dezde sesh anyos ke yo te amo, Lina!  I pensando ke aínda no estás a espozar, no te lo dishe.

Es una koza imposivle, yo amo a Armand dezde sesh anyos.  El también me ama muy muncho i en estas sirkunstansias no puedo amar a otro.  

Lina!  Deshando mi amor por otra parte, yo no desho nunka a ke tomes a Armand por novio.  

De ké? Ké tiene Armand? Es un mansevo onesto, riko, ermozo i lavoriozo, i bushko yo mejor de esto?

No te olvides ke es i un poko korrompido!

- Ah!  Sharl!  No me avles esto! Konosko a Armand komo konosko las kamaretas de mi kaza, él es muy onorado, no gasta moneda en djugos komo uzan algunos mansevos en París i no tiene amor ke sólo kon mí, i ónde vo topar yo un mejor mansevo ke éste! 

Este es el yerro ke tienes Lina! Armand nasió sólo para rekojer en su red algunas dozenas de muchachas I la espesialidad ke él tiene es de deklarar el amor a muchachas de altas famiyas i no a suzias koketas de París.

Sharl, no me kites loka!  Estó más de segura ke Armand ama sólo a mí i no ama a ningunas.

Tu amor por él te está tapando los ojos, si eskarvas i bushkas, vas a ver kómo loke te avlo es verdad.

Antes de espozar yo lo proví munchas vezes.

Esto no es una prova. Tanto un ombre komo una mujer, kuando deklaran un amor mostran a su novio o a su novia, todo loke tienen de dulse i de ermozo en su vida en su komporto, i en su afeksión ma una vez kazados todo lo ermozo fuye, por kitar enmedio todo lo podrido.

Es posivle ke esto akonteska a otros, ma por Armand yo no me lo kreía nunka, estó muy segura ke él me ama de kuerpo i de alma.

I si te provo ke Armand tiene munchas amantes, ké me vas a dar?

Kuálo keres ke te dé? Va dezir ke tú tienes razón, i ke yo me yerrí.

Esto sólo no basta más, más otra una kozika kale ke des.

Kuálo te puedo dar más? Algún regalo en moneda? Ya sé ke no lo akseptas.

No, yo no kero moneda, yo kero tu korasón!  Prométeme ke en probándote ke Armand tiene otra mujer endesparte de ti, me vas a tomar por novio. Alora yo bushkaré munchas provas i te las mostraré en klaro. 

Esta repuesta metía en grande penserio a Lina. Eya no kería kreerse alas palavras de su primo, porke la amistad ke Armand le mostrava le paresía sinsera.  Ma ké puedía eya azer para las provas ke su primo dezea mostrarle? No kreéndoze enteramente a loke su primo le dezía, eya respondió:

Sea! Tú keres ke yo te apartenga? Muy bien! Yo sere tuya el día ke me provarás ke Armand ama a otra mujer!

Es de palavra!?

Sí! Kon la más pura sinseridad.

Alora, yo te lo provare! I asta pokos días!

I levantándose enpiés, Sharl saludava a su prima i se retirava en diziendo entre sí:

Si Sofía reushe, Lina será mía.