La Novia del Muerto - Romanso Sensasional

Author Elia R. Karmona

Kompuesto por Elia R. Karmona 

Direktor del Djugetón

Ideado por Yitshak Rafael Mizrahi

Trezladado a letras Latinas por Miriam Sherman

Kapitolo 2

El amor ke Lina i Armand se tenían era bien sinsero. Mientras los kuatro anyos ke se amaron, no uvo un día onde la manyana o la tadre no se enkontravan. Mismo en invierno kuando la nieve kayía godros flakones, Armand rodeava kada noche la kaleja onde morava su novia i Lina no se travava de salir ala ventana, mismo a media noche. En una palavra, uno por otro se sakrifikavan. 

Enel momento ke Sharl le dezía en saludando la fraze ke konosimos, el korasón de Lina se burakava más fuerte de un rayo. Vender su korasón a otro! Nunka! Nunka eya lo akseptaría. Eya era segura dela amistad de su novio i por kualo ke lo abandonara?

Mirando ke la djente ya se avían ido, Lina se echó en los brasos de Armand en esklamando:

Ah! Armand! Me amas kuanto te amo?! Kuanto te adoro? Este día de oy es bendicho para nozotros.

No es demazía esta demanda ke me azes? Puedría ser más venturozo komo lo so el día de oy?! Ah!

Lina! Tú sos mi alma! Mi korasón! Mi vida! I todo para mí sos tú!

Los ombres siempre dizen ansí kuando están kon sus amantes, ma una ves separados, ke se les mostre delantre alguna más djilvelía, otra más ermoza, eyos se olvidan de sus primer amor por eskojer un segundo.

Tienes tú una idea semejante?

Ah! Te djuro ke no!

Alora por kualo me djuzgas? Una persona djuzga según tiene el korasón.

Ah! Armand! Te rogo ke no penses a esto! Por el sakro nombre de mi padre muerto a tierna edad ke no tengo ningún pensamiento malo, te amo de todo mi korasón, i si me propozaran mismo al ijo del más poderozo rey dela Evropa, yo no lo tomaría.

Alora, estamos de akordo, i por kuálo pensar a esto?

Tienes razón mi kerido, keres venir un poko ala guerta? Me plaze mucho ver el aparesimiento del lunar kon su grasioza klaridad.

Vamos mi kerida, vamos. El Dyó ke no nos esparta nunka, somos los más venturozos del mundo. I tomándola al braso, Armand yevó su novia ala guerta.