Muestros Viaje a los Balkanes

​​Muestro viaje organizado por La Ermandad Sefardi de Amerika i la adjensia Sephardic Balkans: Jewish Heritage Trips empeso en Djunio 22. Aviya 22 partisipantes de komunidades Sefaradi i Romaniote de Nu York, el sud de Florida, Filadelfia i Seatli ke vinieron a un maraviyoso viaje de 11 dias empesando en Bulgaria; Macedonia del Norte; i eskapando en Gresia. Entre los partisipantes en el viaje aviyan miembros de las famiyas Esformes, Sciaky, Calderone, Senor, i Varsano de Selanik; i las famiyas Koen i Cantos de Yanina.

Mos enkontrimos kon los miembros de las komunidades Sefardies lokales, ambezimos sovre la estorias i las tradisiones de kada sivdad, i vijitimos ermosos lugares turistikos.

La primera semana empeso en Sofia i Plovdiv en Bulgaria, i inkluyo vijitas a las ermosos sinagogas, muzeos Djudios, i lugares istorikos.  Mos enkontrimos kon los direktores de las dos komunidades en Bulgaria: Maxim Delchev de Sofia, i Kristian Angelou de Plovdiv.  En Sofia mos fuimos a un konserto en ladino kon el koro de la komunidad Sefaradi kon la kantadera Lika Eshkenazi.  En Plovdiv, el gabay del kal, Alberto Behar, mos konto sovre la komunidad Djudia de oy de Plovdiv en Ladino, i yo traduizi lo ke mos konto.

Dospues de Bulgaria mos fuimos a las sivdades de Skopje i Monastir/Bitola, en Macedonia del Norte.  En Skopje vijitimos el kal Bet Yaakov.  En los dos sivdades mos fuimos a las memorials ke los governos fraguaron para akodrar la shoa. Tambien vijitimos los interesantes lugares lokal i los bazares. 

Dospues de Norte Macedonia pasimos a Gresia, en primero a Selanik. Noventa por sien de los Djudios Gregos murieron en el olokosto.  Mos ambezimos sovre la rika istoria Sefaradi de Selanik de muestro guia Alia Matalon.  Selanik tiene dos kales: Monasterio i Yad Lazikaron.  Selebrimos noche de Shabat kon la komunidad en el kal Yad Lazikaron, i komimos en un restoran kasher dospues de los orasiones.  Al lado de Hotel Astoria ande mos kedimos, aviya el Sentro de Habad de Selanik. Kaminimos en los charshis de Modiano i Kapani.

Dospues de Selanik, mos fuimos a Yanina ande moravan los Djudios Romaniote, I a la isla de Corfu.  Kaminimos las kayes i vimos las kazas ande moravan los antepasados de los partisipantes del grup.  En Yanina fuimos al kal Romaniote Kahal Kadosh Yashan, i al viejo sementario de la komunidad.  En Corfu kaminimos por el sentro istoriko Venesiano, vijitando la komunidad Djudia, i nadimos en las ermosas plajas de la isla.

Finalmente, eskapimos muestro viaje en Atena kon un maraviyoso paseo Djudio, vijitando las dos kales: el kal Sepharadi Bet Shalom, i Etz Hayim, ke es Romaniote; el Muzeo Djudio; la Plaka, kon las kayes estrechas yeno de restorantes, i butikas ke venden suvenires, i joyerias.  El d’alkavo dia mos fuimos a vijitar el Akropolis.

Mos akodramos a todos akeyos ke pedrimos en el olokosto i rekonosimos la ermozura de muestras tradisiones Sefardies i Romaniotes, asi komo la importansia de kontinuar muestra komunidad.

Mersi muncho a los dirijantes de las komunidades Djudia Maxim Delchev de Sofia, i Kristian Angelou de Plovdiv, i a los guias turistikos Elia Matalon en Selanik, Isak Dostis en Yanina, i Michalis Dakelakis en Atena.  Un espesial regrasimiento a Ethan Marcus de la Ermandad, i al profesor Joseph Benatov de Sephardic Balkans: Jewish Heritage Tours.