El Otobus i la Vieja

Está konseja la sentí por primera vez en una konferensia del istoriador Henry Abramson ke uza meter shakás en sus diskorsos.  Se puede sentir en YouTube en el ingléz, ama me agradó tanto ke la trezladí al djudeo-espanyol.

Una vez, en un kazal chiko avía un shofor (konduktor) de otobús.  Kada dia él salía i pasava kon su otobús por el kazal entero.  Un día, se kedó en una estasyón de su kamino, miró en el espejo i vido ke por detrás una vieja venía muy avagar.  

Kon pasensia el shofor asperó a ke yegara la viejizika, malgrado las keshas de los otros pasajeros, porke se adjideó de eya i no kería ke eya tuviera ke asperar asta ke él diera otrun torno por la sivdad.

Al suvir al otobús, la viejezika lo agradesió i se dirijó por atrás i se asentó.

En unos puntikos el shofor ve ke la vieja se avía alevantado i se estava aserkando de él.  Kuando viene a su lado, eya le dize:  “Sinyor shofor, mersi muy muncho por averme asperado.  Te lo agradesko muncho, ke so muy vieja i me tuyen muncho las piernas de estar en pies.”

Responde el shofor:  “Siguro sinyora, no estés a pensar.”

Ensupitó, la vieja avre la mano i le prezenta unas kuantas almendras.

Dize el shofor:  “Kuálo es ésto, sinyora?”

Responde la vieja:  “Sinyor shofor, agradesko muncho lo ke izites por mí.  Por favor, toma estas almendras.  Keshke (‘makare’) tuviera otra una koza más elegante para tí, ama las almendras están muy buenas i espero ke te plazgan.”

Dize el shofor:  “Mersi muy muncho, sinyora.  No es de menester, ama munchas grasias.”

Siendo ke el shofor no avía dezayunado, ya tenía un poko de ambre.  Tomó las almendras i se las komió mientres konduzía.

Un poko más tadre, aboltó la vieja i de muevo le regaló otrunas kuantas almendras al shofor.  Mezmo ke antes, el shofor se las agradesió i achetó el rekompenso.

Diez puntos más tadre, de muevo vino la vieja para dar le mas almendras.  Esto ya le vino un poko kuriozo al shofor i le demandó a la vieja:  “Mersi muy muncho, sinyora.  Te lo agradesko de muevo, i en verdad ke están muy savrozas.  Ama si no te emporta, te podría azer una demanda?”

Responde la vieja:  “Siguro, sinyor shofor.  Demándame lo ke keras!”

Demanda el shofor:  “Me está viniendo un poko kuriozo ke me des estas almendras pokas a pokas.  Deké no me las dates todas en una vez?”

Responde la vieja:  “Bueno, sinyor shofor, la shokolata me agrada muncho, ama las almendras no tanto.”