Figuras chikas son más fuertes

Ay mezes ke los arrevatados bivos ya aboltaron a kaza i uvo una alegría grande en el paíz.

Ama, Hamás reushó en una koza ke no se esperava: Munchos djudiós en la diáspora, ya se averguensan de ser djudiós, i sovre todo los djudiós ke no saven muestra istorya.  Munchos de eyos, saven de la Shoá, i ke fuimos atakados por el governo nazi, se konvensieron de ke la Shoá fue un akontesimiento úniko i eksepsional, i ke el periodo de tiempo depués de la Shoá en ke bivíamos en kalma relativa asta el 7 de oktubre es “lo típiko.”

Ama, si estos djudiós de la diáspora konosieran mijor muestra istorya, ke no se ambeza kaje en las eskolas, verían ke lo ke afitó durante la Shoá no fue tan eksepsional, sino otra manifestasión de las mizmas tendensias ke tenemos sufrido siempre.

I no eskrivo este artíkolo para ke vos tomesh por víktimas.  Es verdad ke fuimos viktimisados en munchas okaziones, ama no tenemos de vermos komo víktimas; tenemos la posibilidad de vermos komo sovrebivientes i fuertes – i kada uno ke melda este artíkolo deve enkorajarse por saver ke él o eya, viene de antepasados ke se protejaron o evitaron la matansina grasias a su intelijensia i fuersa, de lo kuálo kale ke seamos muy orgolyozos.

En verdad, munchos grupos minoritários se enfrentaron a menasas semejantes a las ke mos enfrentavamos mozotros, ama no todos sovrebivieron. Ama mozotros somos de los ke sí [daínda estamos akí].

Rogo a mis lektores de rekonoser tres verdades, leyes, ke mos da a entender muestra istorya:

1. Figuras chikas son más fuertes ke las grandes

2. Estas figuras chikas (grupos minoritarios) siempre van a ser los scapegoats

3. Esto mos afitó munchas vezes, no sólo durante la Shoá

Figuras chikas son más fuertes ke las grandes

Karakterístikas de los grupos majoritarios vs minoritarios

Los grupos ke amuchiguan se azen más fuertes. Ama yegan un punto en ke amuchiguan tanto ke ya no pueden sorportar su propia grandeza i se azen débiles.

Ay una tendensia muy típika ke se ve durante toda la istorya. Un governo (o una autoridad) toma poder, se engrandese, konkista a otros grupos, yega al punto en ke ya no puede soportar su propia grandeza i entra en su dekadensía.

Esto afitó a los romanos, i también a kaje todos los otros imperios ke se engrandesieron de una manera presta i sin kontrol. Muncha djente pensa ke, por eshemplo, el Kalifato en Andalusía fue konkistado por los reinos kristianos ke rekonkistaron la Peninsula. Esto no es djustamente korrekto, sovre todo porke el Khalifato Andalús ya avía entrado en su dekadensia, i se avía aminguado durante kaje 800 anyos antes ke las armadas kristianas abasharan por primera vez para tomar atrás el territorio.

Los grupos ke permanesen chikos (poko númerozos) tienen el risko de ser atakados i aprimidos por los grupos grandes, ama también forman práktikas ke los enfortalesen.   Akumulan manaderos i los reparten entre poka djente, rezultando munchas vezes en una povlasión bien ambezada, konektada i protejada.

Tienen de sorportar opresión del grupo majoritário, ke provoka la formasión de uzansas provechozas, por eshemplo:

1. Okupan ofisios no dezeavles, ama kon reushitá. En los Estados Unidos, kuando munchos grupos minoritarios arrivaron por primera vez, se limitavan en los kargos ke podían okupar, munchas vezes por modo de la diskriminasión del grupo majoritario.  Ansina, munchos de los inmigrantes avrieron negosios komo lavanderías (o otros servisios semejantes). Anke paresieran ofisios bashos (las lavanderías), eran muy provechozos:

   • Siempre avía lavoro porke siempre avía ropas a lavar

   • Eran fleksivles:  Una lavandaría podía vender servios a individuos i a negosios

   • Tenían buen rendimiento i márdjina:  Los kostes podían suvir o abashar asegún las véndidas (Los djudiós en Turkía i NuYork de los anyos 20s también azían estos tipos de ofisios, komo shastrería i produksión de ropas)

     
     

2. Sosiedades de alta konfiansa: Formaron komunidades chikas i serkanas en ke todo el mundo se konosía i no era muy probavle ke uno se aprovechara de otro. Esto les dava una efikasidad en su manera de kumplir los negosios ke no se topava en otras kominidades (de la majoritá).

   
   

3. Formasión de eskolas adisionalas:  Avrieron eskolas partikolaras para ambezar sus propias linguas i kulturas a los ijos, i ansina también los ijos se aprovechavan de ambezamiento adisional en otras kozas komo matemátikas i sensia.

Estas figuras chikas i fuertes siempre van a ser los scapegoats

Estas komunidades, anke empesan en pozisiones bashas en la sosiedad, fruchiguan presto. Más muncho, la primera djenerasión se dedika a ofisios no dezeavles, ama también pueden pagar buenas kazas, i buenas eskolas a sus ijos.  La segunda jenerasión más muncho yega a formar la klasa media ekonómika.

Este fruchiguamiento munchas vezes provoka selos en la poblasión majoritaria. Los imigrantes asiátikos en California sufrieron atakes terrivles durantes los anyos 70 por modo de ke mientres avía munchos problemas ekonómikos en las grandes sivdades, las famiyas asiátikas, en jeneral, kontinuavan a fruchiguar.

Los armenios i gregos en la Turkía, después de la Revolusión Turka, okupavan kaje toda la klasa media ekonómika, i ansina arresivían muncho aborresimiento de los turkos.  De este modo, se formaron los dasios (impuestos) adisionales a los “no turkos”, lo ke más tadre okazionó ke munchos gregos i armenios (i djudiós) se mandaran zorlán a los kampamentos de lavoro en Ashkale.

Esto afitó munchas vezes, no sólo durante la Shoá

Oy en día, egziste la idea de ke la Shoá fue un akontesimiento partikularmente kruel i singular. Ama la verdad es ke no fue tan singular. Los djudiós, i otros grupos minoritarios, siempre fueron atakados, matados i arrondjados por los grupos majoritarios. Akí vos do unos kuantos enshemplos, ama kale rekonoser ke ay munchos más.

La matansina de los djudiós por los romanos - Kuando los romanos derrokaron el Segundo Templo en Yerushalaim en el primer siékolo de la era komuna, también mataron a la mitad de la populasión djudía i se yevaron a la mitad de los ke kedaron a Roma por esklavos. Ayí estos esklavos más tadre se liberaron (la ley romana dava al esklavo el derecho a merkar su propia libertad kon su lavoro). Empesaron a formar sus propias komunidades en la Peninsula Italiana i muncho más tadre un grupo de eyos suvió a la rejión ke es aktualmente Fransia i Almania i formaron la komunidad de Ashkenaz.

La matansina en Granada - En 1066 un djudió, Joseph ibn Naghrela, arresivió un kargo alto en la administrasión de la sivdad (entonses governada por una taifa, o administrasión rejionala muzulmana), lo kualo provokó una reaksión violenta por parte de la poblasión muzulmana i más tadre la matansina de más de 4,000 personas en un día.  Kale rekonoser ke no fue el governo ke kijo matar a los djudiós, sino ke el puevlo muzulmano ke tomó por insulto el nombramiento de un djudió a un kargo en el governo.

Las matansinas en Evropa de Oeste Medieval - Entre 1100–1400 los djudiós fueron eksterminados en Evropa del Oeste en una serie de atakos por varias kavzas.  Por eshemplo, se akuzaron de respander la Plaga Bubánika, i kuando empesaron las Krusadas, munchos de los kazalinos kristianos optaron por matar a “erejes” en su propia Evropa en lugar de viajar tan leshos komo la Tierra Santa.  Todo rezultando en ke la poblasión de djudiós en Evropa de Oeste aminguó a un 10% de su número orijinal durante el periodo, i munchos de los sovrebivientes se tuvieron de desplasar al Evropa del Este (los territorios ke son aktualmente Polonia i Lithuania).  Kuando oy en día se avla de los problemas jenétikos del puevlo ashkenazí, se pueden atribuir a esta aminguasión en la poblasión i ke kaje todos ke somos ashkenazís venimos de esta muy chika poblasión sovrebiviente.

Las leyes Familiant del Emperio Austro-Ungaro de los 1700 i 1800s - El Emperio Austroúngaro kitó unas kuantas leyes en los 1700 i 1800 para kontrolar la poblasión djudia en sus territorios.  Una de estas leyes Familiant proklamava ke solo el primodjénito de kada famiya djudia tenía el derecho de kazerse, i se tenía ke prezentar a la autoridad lokala para prevarse de su nivel de edukasión, de aver pagado sus dasios i otras kozas antes de ke le konsediera un permiso de kazamiento.  Los demás ijos no podían.  Por modo de esto, muncho de los ombres djudiós no-primodjénitos, se fueron a otros lugares komo los Estados Unidos, Rusia o el Emperio Otomano.

El Farhud en Baghdad - En 1941, akontesió un pogrom kontra la poblasión djudia de Irak, provokado por el partido politiko pro-Nazi del paíz en ke se mataron entre 135 i 190 djudiós i se derokaron kaje 1,000 kazas djudias.  En las semanas después, uvo manifestasiones en las kalejas de Baghdad anti-judias, i a pokos anyos kaje la poblasión entera de djudiós irakís se fuyó a otros paizes.  Estos akontesimientos fueron antes del nasimiento del estado moderno de Israel, a la kontra de la falsa akuzasión de ke la formasión del estado provokó todos los problemas a los djudiós en el Medio Oriente.  Baghdad, asta akel tiempo, era una de las sivdades más djudias del mundo:  Se estima ke un 20% de la poblasión era djudia, más de Nu York.

Los Kampamentos de Ashkale en Turkía - En 1942, después de la kaída del Emperio Otomano i la Revolusión Turka, kitaron dasios (impuestos) adisionales a grupos minoritarios en Turkía (los armenios, los gregos i los djudiós).  Estos grupos minoritários, si tadravan en pagar los dasios altos, se mandaron a kampamentos de lavoro en la rejión de Ashkale en el Noreste del paiz.  Un grande número de estos detenidos murieron ayí, i muy pokos reusheron aboltar a kaza.

Es verdad ke la Shoá fue un enshemplo de matansina terrivle, ke no se deve ulvidar nunka.  Ama también tenemos de rekonoser ke no fue la primera vez ke fuimos atakados ni masakrados.  La istorya se inchó, i en el Oksidente i en el Este, de enshemplos en ke muestros vezinos tomaron la dezisión de atakarmos, a vezes enkorajados por el governo, ama munchas vezes, en kontra de los dezeos del governo.

Egziste la narrativa de ke Israel fue una kreasión imperiala impozada por una ideolojía oksidentala, ama la realidad es ke el renasimiento del estado de Israel fue una repuesta a un problema ke siempre egzistía, ke ande fuera ke mos fuesemos, siempre fuimos atakados i aprimidos por muestros vezinos i ya no lo keríamos más sorportar.

Konklusión:  Kuálo devemos azer?

Kale konoser i ambezar muestra istorya - Si no, se puede enganyar por la narrativa de ke somos los malos.  Kale dar a entender, si no al mundo entero, a lo manko a muestros propios ijos, ke no fue la formasión del estado moderno de Israel ke kavzó muestros problemas, sino ke fue una repuesta a las munchas menasas ke siempre avíamos sufrido.  Devemos de ambezar no solo muestros tekstos relijiozos, sino ke también muestra istorya durante la Galút.

Devemos konoser la istorya de todos los grupos de djudiós - No solo muestro propio grupo;  los ashkenazim deven konoser la istorya de los sefaramdím i los mizrahim, i la kontra.  Es verdad ke mozotros damos muncha importansia a las diferensias entre kada grupo, ama muestros enemigos no ven estas diferensias–para eyos, solo somos djudiós–i devemos de protejarmos de una forma unida.

No vos konfiesh en las eskolas i institusiones grandes - Las universidades komo Colombia se incheron de aktivistas ke tienen sus propios butos i propias intensiones.  Si keremos ke muestros ijos de verdad konoskan muestra istorya, kale ke formemos muestras propias institusiones o ke les ambezemos de mozotros para mozotros.  I akavidavos de las universidades más “aktivistas” – munchas de las universidades más konosidas ya se incheron de odio antidjudio: Columbia, Brown, Georgetown, etc., i anke fueran insititusiones de ambezamiento bueno en algun momento, ya no lo son. Mirad de ver kuántas parás arresiven de otros paizes, p.esh., Qatar.  Mirad sus kursos online, a ver si la más parte tienen ke ver kon “Middle Eastern Policy” o sujetos semejantes.

Aprovechavos de los manaderos ke ya egzisten - Ay munchos manaderos online al muestro alkanse:  (65) Henry Abramson - YouTube, (65) Sam Aronow - YouTube, entre otros, son muy buenos istoriadores ke krean vídeos i otro kontenido ke ambeza muestra istorya. I avlad kon vuestros kales, ke integren la istorya djudia en sus ambezamientos, no solo la istoria relijioza sino ke también la de la Galút.