Shakas de Nissim

1. Sovre animales

Un gato ambierto estava asegiendo detrás de un ratón. Se fuyó  el ratón i se entró  en un burako en la pared.

Asperó  el gato kon pasensia. Pasó  tiempo, i el gato no se iva, i el ratón ya kería salir.  En súpito, empesó el  ratón   a gritar komo un perro, i el gato se fuyó.  Pasó por ayá un amigo del ratón i le demandó, "kuálo estás aziendo?"   Disho el  ratón, "Akí para kedar bivo, kale ambezarse una otra lingua..."

2. El kasador (hunter)

Un kasador entró ande el doktor, i le demandó, "Sinyor doktor, kómo puede ser ke mi mujer está prenyada en tiempo ke mos akavidimos?"

Disho el doktor, "Te vo arresponder kon una konsejika:

Un kasador salió a la shara (foresta), ama en saliendo tomó un chadir en lugar de su tofek.  

En la shara, kaminó  i vido un león muy serka, pronto de saltar enriva  de él.  

El kasador alevantó el chadir i lo apuntó al león. 

Ensúpito, se sintió un tiro i el león kayó muerto." 

Saltó el kasador i le disho al doktor,  "Es otro kasador ke lo tiró."    

"Sí", disho el doktor, "ya entendites..."

3. El eksploatador

Un ombre kurdí entró a un supermerkado grande.  Tomó una bolsa de Bamba, kumiya komió un poko i la metió a su lugar.   Tomó otra, komió un poko i la metió a su lugar.  

Vido un lavorador del super, i le demandó, "Ké estás aziendo?"

Disho el  kurdí, "Akí está eskrito: '25% de baldes'".

4. El guerko

En un kal se sintió bruido, se arrankó la puerta, i kon fumo entró el guerko.  Todos se fuyeron de las ventanas i el rav se eskondió en el Arón Akódesh, i kedó solo un viejo asentado a su lugar.

Le demanda el  guerko, "Tú no te espantas de mi?" 

"No", disho el viejo, "ya ay 50 anyos ke estó kazado kon tu ermana..."

5.  El dezesperado

Un ombre estava asentado en un kafé, i serka de él, sovre la meza, una tasika de kavé.  

Ensúpito se asentó  a su lado un mafiozo negro, se bevió el  kavé, i le disho al ombre, "Ké mos kontas?"

Le arrespondió el ombre, "Mira, antes una semana, se murió mi madre; ayer kedí sin lavoro; oy vide a mi mujer kon otro ombre; me metí tosho (poison) en mi kavé, i estuve pronto de beverlo..."