Moshé, Miriam i Aarón en la sinagoga de Dura-Europos

En 1920, askeres inglezes, en eskavando en Salhiyé, Siria, toparon paredes kon pinturias muy antikas.   Sigiendo kon su lavoro por munchos anyos, deskuvrieron la sivdad de Dura-Europos, ke fue abandonada después de un asedio en 256 o 257 kuando fue kuvierta kon lodo i arena.  Algunos yaman a esta sivdad la “Pompeya del desierto” porke esta kuviertura la konservó muy bueno.

En los sigientes anyos, los arkeólogos deskuvrieron munchas fraguas ke amostran ke ayí bivían endjuntos munchos puevlos de kulturas diferentes: romanos, gregos, sirianos, partos, sasanios i djudiós.  Kuanto a las relijiones, avían templos paganos, una iglesia i una sinagoga.  La  sinagoga fue deskuvrida en 1932 i es una de las más antikas, datando del anyo 244.  En sus paredes se topan diezenas de pinturias ke son el eshemplo más temprano de arte djudío.  Estas pinturias amostran temas del Tanah i del Midrash.  

En muestros eskritos, ay munchos midrashim ke mos kontan istorias sovre Moshé, Aarón i Miriam.  Los midrashim más antikos datan también del siékolo tresero.  Son muy interesantes porke anchean las istorias de estos importantes personajes de muestro Tanah.  Agora ke vamos a fiestar Pésah, es bueno konoser a las personas ke giaron a muestro puevlo en saliendo de Aífto, kon ayuda del Santo, Bendicho El.

En la sinagoga ay pinturias de Moshé, Miriam i Aarón, ke amostran diferentes tiempos en sus vidas.  Todos tenemos meldado i sentido lo ke mos konta la Torá sovre estas tres personas, ma algunas de las pinturias mos ambezan otras kozas ke no aparesen en el tekso i ke eran muy konosidas en akeya époka. 

• Miriam i su madre Yoheved komo kumadres ke ayudavan a las mujeres israelitas a parir.  Sifré de Bamidbar mos dize ke las kumadres son Yohéved i Miriam: Shifrá es Yohéved i Puá es Miriam.

• Yohéved metiendo al bebé Moshé en el río en una kanastika.  Esto lo podemos meldar en Shemot 2:3. 

• Miriam eskondida a la oriya del río kudiando a su ermaniko Moshé, komo meldamos en Shemot 2:4.

• La ija de Paró topando al bebé Moshé en el río, komo mos konta Shemot 2:5-6.

• Miriam tomando a Moshé de la ija de Paró para toparle una mamadera, asegún dize Shemot 2:7-9.

• Moshé i el arbusto ardiente, komo meldamos en Shemot 3:2-3.

• Moshé i los israelitas kruzando la Mar Kolorada, en Shemot 14 i 15.

• Moshé i el pozo de Miriam kon dodje ríos, kada uno indo a una tienda ke reprezenta a una de las trivos de Israel.  Pirké de Rabí Eliezer mos dize ke en el futuro, la agua del pozo se va a repartir en doze ríos, uno para kada trivo.  Asegún el Midrash, este pozo maraviyozo segía a los israelitas en sus kamino por el dezierto para ke nunka les mankara agua.  Fué uno de los tres regalos ke el Dió le dió al puevlo: El maná en onor de Moshé, el pozo en onor de Miriam, i las nuves ke protejían a la djente en onor de Aarón.

• Moshé resiviendo la ley, asegún meldamos en Shemot 19-20.

• Aarón inogurando el Mishkán, komo mos konta Vayikrá 8-9.

• Moshé meldando la ley, asegún vemos espesialmente en Devarim.

• Moshé suviendo a los sielos.  El Midrash Petirat Moshe mos konta sovre esto, i aunke parese ke se eskrivió entre los siékolos 7 i 10, la pinturia amostra ke en esta époka ya konosían la istoria de ke Moshé no murió, ma suvió a los sielos.  

Ansí podemos ver ke kada una de estas pinturias es un midrash visual, kon bazas

en la Torá i en los kuentos ke kontavan los hahamim en akeyos tiempos. I esto mos

aze apresiar la valor de muestra istoria i muestra erensia.